[旅遊] 2016 大肚dum遊食澳門之旅三天兩夜 ● JW Hotel、萬豪中菜廳、莫義記、8 1/2 Otto e Mezzo BOMBANA、葡國美食天地、Urban Kitchen

[旅遊] 2016 大肚dum遊食澳門之旅兩天一夜 ● JW Hotel、萬豪中菜廳、莫義記、8 1/2 Otto e Mezzo BOMBANA、葡國美食天地、Urban Kitchen

15 - 17 FEB ,2016

大住肚仲周圍去。。。個陣好似 32WEEK 好似係新年黎既。。。難得老公百忙之中都有時間出走下~ 幸好有好去咋！生完都要一輪先再有機會二人世界喇！生完仔之後睇返立即覺得好彩個陣有去咋～哈哈！開心下都好嘛～不過今次都係非常閒～好似有間新酒店有８字摩天輪都未去。。。因為大住肚比較懶，可以留係酒店休息食下野我就夠架喇！

今次入住澳門 JW Marriott 萬豪酒店ＲＭ１７２７０我已經同個７字密不可分～

嘩～酒店房都係好靚，ＪＷ其實真係好抵住，個陣有優惠大約＄８００＠晚，一家大細黎玩返一兩晚，樓下又有咁多地方可以行街，俾小朋友放電既地方都有，不過我無留意，又有好多餐廳～食下ＢＵＦＦＥＴ咁～正！好期待帶埋淳淳一齊去玩呀！

景觀，望園景，環境好好～

令人非常放鬆的大床～

浴室設備齊全，特別係貼心既馬桶，坐上去暖暖的

晚上浸下浴，人生一大享受～

不過孕婦沒有興趣～哈

自助吧有即沖咖啡機，下次我會試試點用～

個鍾幾靚～

大肚影下相啦～

去醫醫肚，行去以前叫金龍既酒店，呢加變左百老匯，好靜～

而且餐廳都係內地人，連侍應都係～食左餐麻麻地既飯～

之後我返酒店訓覺。。。訓覺佔左我每日既一半時間

晚餐去左萬豪中荼廳，因為訂酒店送既，好抵咧～

味道尚算ＯＫ，份量是食飽剛剛好～

燉湯最好飲～甜品都好好味～

新年流流影張合照先～

基本上我呢個懷孕期無特別愛上甜品，但都會食既，一場黎到我就好想食木槺布甸，仲要一定食莫義記，不過一場黎到後發現已經越賣越貴，仲要好細杯呀！不過算啦～食到已經好開心～老公就食佢最愛既榴槤雪糕～

木槺布甸好似雪糕咁，好香滑好好味呀！

個陣天氣凍凍地食都幾正，起碼唔會溶

走個陣仲買必達士既木槺蛋糕，同樣好貴～因為相隔太耐我只記得貴。而忘記價錢！哈

拎返酒店慢慢嘆～

GOOD MORNING :) 又是美好的一天開始。。。

超級大圓球出動～

訓醒就去食午餐～今次訂左位於JW 酒店內既餐廳8 1/2 Otto e Mezzo BOMBANA, 原來呢間餐廳都幾威水架,澳門呢間係一星，而香港個間係意大利境外唯一一間既獲得米芝蓮三星既意大利餐廳，香港個間聽聞好難訂位～好厲害！講到咁。。。我好有興趣試，前一日姐係尋日啦～打去訂檯竟然有位～正呀！［銀河優越會有折扣］

我地１２點就到，佢地剛剛開門，全間餐廳無人既～正！

講真食貴野最抵都係食ＬＵＮＣＨ～＄３８０就已經有２個ＣＯＵＲＳＥ（包埋茶／咖啡），另外加＄８０會有款甜品，再加多＄８０又會有多杯ＷＩＮＥ～相對黎講都算幾抵架喇！而且係食得飽既放心～因為有麵包籃任你食～哈哈！

有一星，環境當然好啦！我仲覺得呢度好靚好浪漫好高級咁～服務非常非常好！超貼心～細緻到有熱毛巾，放餐具又唔會大大聲，反正就好有禮貌啦！哈哈～

呢餐好飽既原因係有好好食既麵包籃，籃中有三款麵包及兩款脆餅，我大愛最左上角個款，係可以任食既，而每次係會一籃新鮮既俾你，所以係好飽。

［ 8½ Seafood Soup海鮮湯］非常鮮甜，上碟時海鮮還是生的，內有小片龍蝦肉、帶子、貝類及意大利青瓜粒，用熱騰騰既海鮮湯倒落去，立即熟左

老公既龍蝦前菜，不知味道如何

和牛紅酒汁配薯蓉，和牛係淋到入口溶左咁～上面薯蓉真的非常好食夠滑夠Creamy

為肚裡面果個食左餐豐富大餐表示好高興

ＬＵＮＣＨ　ＳＥＴ係包一杯餐飲既，可以叫咖啡／茶

老公既ｃａｐｐｕｃｃｉｎｏ，有埋餐廳名做裝飾點綴

餐廳用上ｔｅａ　ｆｏｔｅ，高級既立體茶包，有埋視覺上既享受。

呢一餐好滿足呀～食貴野就真係要揀午餐，價錢化算好多～

加＄８０又可以加份甜品，呢度既甜品都好出色呀～特別鍾意朱古力個款甜品

食飽飽打算無咩做去游下水，點知天氣真係好好好好凍，溫生都堅持叫我落黎行轉，仲換哂泳衣咁。。。傻傻地既，完全唔驚會凍親我既～最傻係我聽佢話。

最後我縮埋一邊，仲要好大風呀～寒風大到～

唔怪得無人啦～凍到人地都俾杯熱水我地呀！

傻人真係有落水，我見佢仲好輕鬆咁游走下，唔使５分鍾立即凍到彈返上黎～哈哈～好白痴！

到晚餐。。。都話淨係食架啦！哈哈
晚餐去左已經幾年前去過既葡國美食天地 ↓ ↓ ↓
不過無訂檯被安排坐街,都好丫~ 可以睇街景~

葡國美食天地 A Petisqueira　　
地址氹仔舊城區生央街15C-D號　TEL: 2882 5354

我睇返就記得溫生好鍾意食呢款葡式海鮮飯, 我仲話煮俾佢食添。。。我呢加記得等過兩日煮先~

好餓。。。狂食！燒雞YUMMY~

嘩！好飽～

食完行返去酒店～見到莫義記上面有條樓梯，整左好多ＬＥＤ燈既裝飾上去，係就係好靚，但睇好喇～記得眼看手勿動。

又是一個ＧＤ　ＭＯＲＮＩＮＧ～

終於準備返香港。。。我阿媽好擔心我，驚我係澳門生仔～哈

咁大個肚當然要影下相先啦！

睇返Ｄ相好懷念小溫子淳淳係我肚入面呀～真係好神奇～

呢加已經就快三個月，ＥＥ哦哦咁講野～

媽咪ＬＯＶＥ　Ｕ　ＢＢ

二人世界。。。我個鼻大到成龍咁呀～頂！

ＨＥＡ到ＣＨＥＣＫ　ＯＵＴ先走，因為要去名廚都匯食ＬＵＮＣＨ　ＢＵＦＦＥＴ
嘩！好放縱咁食，但都堅持唔食刺身既～哈！
名廚都匯係ＪＷ酒店１樓，我前一晚見晚餐好多人食～好似有生蠔，不過午餐就無啦～反正二佰幾蚊有咁多野食，都算好合理～除左甜品好普通之外，其他都好食既～
切牛個位廚師仲細心到切全熟俾我，係好細心好多謝，不過咁熟好鞋呀喂～

名廚都匯 Urban Kitchen
地址：路氹城「澳門銀河™」綜合渡假城澳門JW萬豪酒店1樓　電話號碼 8886 6228

前菜總類好多～