[育兒] 小溫子。ONE MONTH

[育兒] 小溫子。ONE MONTH

現在回看剛出生的小溫子, 真係好細粒。今天剛好兩個月多少少, 昨晚睇返剛出生時既相, 真係覺得小朋友大得非常快, 當媽媽的立即忍唔住要攬住個仔狂錫。初為人母, 什麼都不懂, 只有不停問, 不停學習, 小溫子算是比較好照顧既寶寶, 唔算經常哭鬧, 只要夠飽就可以, 只要一餓, 奶未到嘴一定大叫, 所以接近滿月時體重增長得好好。

不過開頭剛回家時都有碰到不少釘, 而且剛生完, 生理同心理都有影響, 唔好講笑, 屋企人同老公係好重要, 我覺得生完個心會經常有唔開心既感覺出現, 心理呢部份留待講坐月時再寫。

第一日返到屋企, 其實係開心既, 因為可以返屋企休息, 但亦知道返到屋企就係無得休息咁解啦！出院前我內心充滿好多疑問, 好怕自己唔識照顧初生嬰兒, 幸好我有偉大既媽咪幫忙, 晚上有陪月姨姨, 而工人姐姐都好幫到手, 有佢地我先可以應付到, 因為真係乜都唔識, 但我成日都提自己唔可以亂, 冷靜, 有咩情況都要冷靜, 慢慢處理, 唔好急一急只會亂。

講返返到屋企先啦~ 咁一返到黎就要食奶, 本來我對餵奶都好有信心, 因為我一開始都係餵奶粉先, 我對人奶呢方面唔太執著, 一心都係諗住有就餵, 無就奶粉啦！見係醫院餵水奶餵得咁好，返屋企應該無問題啦，仲好有信心咁，因為小溫子都好合作食得好好。點知問題就黎喇。。。因為醫院餵既係水奶，都係奶粉姐，但問題就係個奶嘴，因為我第一餐係屋企餵竟然餵唔到，飲左一個鍾先飲到10ML，但眼見小溫子好用力食，無理由食唔到，一直都唔明，以為佢唔習慣啦！所以飲唔到我都唔擔心，就下一餐再餵。

（點解唔埋身餵人奶？因為我未開始上奶，谷都未谷過，而且係醫院試埋身，小溫子唔足月比較細，食奶既力都比較弱，所以佢係唔識埋身食，而且我都未出到奶。）

之後沖涼就係婆婆幫手喇！婆婆好熟手無難度。到下一餐奶問題就到，又係食唔到奶，食左一個鍾都食唔到10ML，我個下心情好煩躁，好無助唔知咩問題，點解小溫子食唔到奶。我就發現係個奶嘴，出院前姑娘問我用咩奶樽，佢有講解過用CHUCHU既奶樽個嘴係十字嘴係要BB夠力食先可以用，如果唔係佢會唔夠力食，立即打俾陪月問下點算好，陪月姨姨教我去買既黃色扁嘴既軟膠嘴，會岩返初生用，買左之後發現同醫院用既近似，因為醫院用既係一次性奶嘴，所以無再軟身少少，買到返黎終於餵到奶喇！小溫子食到奶，我先放心，幸好當晚陪月姨姨黎到幫忙照顧，我終於可以鬆口氣～

紀錄

餵食：剛回家時大約５０—７０ｍｌ然後慢慢遞增到半個月１２０ｍｌ到滿月 (食量倍增無誤)，每３小時餵食一餐

媽媽奶／奶粉：媽媽是全泵人奶媽咪

只有第５天剛開始上奶有全日只泵出４０ｍｌ，到近滿月時全日已泵到５００ｍｌ

所以每天大約２—３餐補奶粉

睡眠：非常好，小溫子能每天餵奶食飽後就訓到下一餐醒

小溫子第一次返屋企飲奶

NUK 初生軟膠扁身奶嘴

第一次返屋企沖涼

係屋企訓醒既朝早，好可愛呀！好細細粒～

陪月姨姨早上幫小溫子沖涼，仲好細粒呀！

早晨飲支奶先～

新手媽媽成功泵出第一支人奶～30ML

YEAH ! 有媽媽奶食~

第一次去健康院，點知初生黃疸指數高（我個間健康院指標）醫生話要立即入院抽血睇指數，原本我就聽朝一早返仁安睇黃疸高唔高，但健康院醫生話佢高，要立即去醫院（講到非常嚴重，係強調立即立即立即）要我揀去私家定政府，咁我地又驚政府搞好耐，就返仁安睇醫生啦！幫我跟開既兒科醫生放假，咁見另一位陳樹仁醫生，講解好清楚，而且陳醫生幫小溫子檢查後發現唔算太高，係仁安既黃疸指標尚算合格，不過黃會慢慢退，如果我地驚既，可以安排立即入院照燈，最後都係決定係醫院照一晚燈，等退黃退得快一點～其實小溫子入返院我係安心既，因為姑娘會幫我好好照顧佢，２４小時後先黎接下小溫子。

放低個仔一晚，其實內心好心掛掛，口就話無野～

見佢係燈箱度照個下個心既ＵＰ～拿拿聲閃人～

俾姑娘見到我眼紅紅肯定覺得呢位媽媽真誇張～哈哈

第二朝１０：３０去醫院餵奶，其實想見下小溫子點，

照左一晚燈會呆呆地，不過見到佢個心都定Ｄ

而且姑娘仲好好教我按摩上奶上得好Ｄ～

對我地黎講入院係學到野返黎～

夜晚見埋醫生我地就可以返屋企喇！媽媽同一隻肥豬無分別！哈哈

陳醫生話過多五日先返健康院見醫生，黃會退得好好多

飲奶奶

老老積積既小ＢＢ

原來ＢＢ真係大得好快，日日見唔覺，睇返相就好覺～哈

。三代同堂。

爸爸每日放工最期待見到小ＢＢ

舅父仔同小馬黎探ＢＢ

眼神可以友善點嗎？

好似老人家

爸Ｂ～父子情深

連黃姨姨都睇小ＢＢ，黃姨姨好錫ＢＢ架～

婆婆日日都黎睇我

訓得好淋

小溫子

餐餐都好好胃口～

開始爛屁股，開頭只係少少紅，到最後半個月都唔好，仲要爛到月亮位都紅紅咁，最後要睇醫生，換尿片牌子，用熟水洗屁股先好返。呢加睇返爛屁股相都覺得好痛，當時小溫子只係有屎尿先叫，已經算好乖，睇返到心痛。因為小溫子屁股皮膚比較薄，用熟水濕棉花抹，都會抹損左，而且剛剛食人奶會經常大小便好多，換片換得密，抹得太多都會損，我應該一早聽婆婆話用溫暖熟水洗屁股最好，又最乾淨～幸好呢加已經好返哂喇！

當晚痛到要係媽媽心口攬住先訓到，慘～