[生產] 小溫太產下小溫子 完整紀錄。文多慎入

[生產] 小溫太產下小溫子 完整紀錄。文多慎入

２０１６年３月１４日我們的寶寶出世喇。

一轉眼寶寶就快滿月了，為左紀錄我生仔時既一切決定寫篇卜記得，生仔真係令人一生難忘，除了痛，還有無盡的甜。

我生仔算非常順利，由本來既剖腹生產變自自然分娩，在毫無準備下當天晚上直接生左小寶寶出黎，時間一切來得太快，快得好像一場夢。

寶寶預產期為４月１３日，原本決定４月１日開刀生，因為驚痛，４月１日剛好為３８週最快既開刀日子，但寶寶實在太期待來臨這世界，係３５週５天就搶閘出世，足足早了一個月，係早產嬰兒，感恩寶寶非常健康，磅數亦好夠可以跟媽媽當天一齊出院。

３月１４日當天下午原本無所事事既我，決定訓個下午覺，訓醒大約３：３０ＰＭ去廁所時發現紙巾上有血，真係非常少既血，不過都擔心就係見紅。返房後立致電診所，姑娘叫我立即到診所見醫生檢查，

心諗應該無事既，完全唔覺得見紅係一回事（冷靜狀態）

立即致電老公叫佢立即去診所等，

但都驚去既途中有其他狀況，

我決定帶埋姐姐一齊出發去診所有個照應，

上到的士既途中已經覺得肚好似有Ｍ痛既感覺，

突然又感覺到好似有水慢慢流落黎，

唔理咁多拿拿聲上診所做檢查，

同一般產檢程序一樣，先驗血壓、驗小便再等見吳醫生。

一入到去見到吳醫生講下個狀況後就照陰照檢查，

點知打算除褲個刻，我又感覺到好似有水咁流出黎，

為左唔樣衰，我同醫生講我急尿要去廁所先，

一去廁所用力以為真係小便，但我發現真係唔係喇！

我好肯定係穿左羊水，立即出返去同姑娘講，

醫生馬上幫我做檢查，先照超聲波睇下寶寶既大細磅數，

再照陰超睇，已經穿左水，開左２度，要立即去醫院生。

吳醫生都有講因為未足月，早產嬰兒有一定風險，

不過見寶寶既大細狀況建議我順產，

但我又未驗Ｂ鏈，因為３６週先做呢個檢查，

但都唔理得咁多，一切既入院文件醫生幫我安排，

呢個時候我同老公就立即趕到醫院準備生仔喇！

去到仁安姑娘立即幫我做登記，登記時已經開始出現陣痛，

大約５分鍾左右一次，之後時間越來越短就痛一次，

痛既感覺係似十級Ｍ痛帶點失控感。

之後被安排到侯產室，

姑娘話我今晚就生得，一切黎得太快，

完全無時間去紀錄低一切，

因為太痛，但我又唔敢大叫，我怕生個陣無力，

最多都係深呼吸，一痛就捲埋一舊，出汗出到全身濕哂，

換好衫上床訓低後就安胎心機，聽住ＢＢ既心跳聲，

之後姑娘教我聞笑氣，之後又幫我驗Ｂ鏈不過報告又要等聽日先出，

姐係生完有Ｂ鏈既話先再解決（幸好我無Ｂ鏈）

之後有位好唔耐煩既姑娘黎幫我種豆（中左都用得著，因為當晚發燒要吊鹽水），

之後再抽血等，抽血個姑娘好好，教我一唔痛就聞氣，

因為痛緊個陣根本無辦法去用力聞氣，好似個癲婆咁狂抓張床，

我老公不停係耳邊叫我放鬆放鬆同埋對住個肚講：ＢＢ乖呀！快Ｄ出黎喇！媽媽好痛呀！

雖然老公幫唔到我，但有佢係旁邊點都安心Ｄ，

因為痛到好慘，又唔叫得，密密地痛後我終於見到醫生黎到喇！

見到醫生好似見到一度曙光，忍唔住同醫生講，我好痛，你俾我開刀啦醫生！

醫生堅持你得架喇～ＢＢ好細之嘛！無問題架，放心一定生到。

個陣先係開到４度，漫漫長路呀。。。。。

我已經無留意時間，只係覺得過得好快，

痛痛下又一個鍾，一痛到頂唔住就叫姑娘黎幫我睇下開左幾度

４度維持左好長時間，到醫生又黎既時候，叫我張開腳做檢查，

原來係人手穿水再幫我加快開既度數，

唔知醫生點整，但我只係知道我痛到大叫，

痛到眼淚水都標出黎，

嘩！我生仔竟然一句粗口都無講，可能痛到唔識表達～哈哈

當醫生隻手出返黎，我立即唔痛仲鬆左口氣舒服左，

不過轉過頭又痛過～慘～

醫生笑笑口話好快架喇～忍多陣啦～好快生得架喇！整痛你唔好意思呀～

又再等等等，越來越強烈既Ｍ痛，

老公幫我瘋狂地聞笑氣，因為我痛到無力聞，

聞到個人暈暈地仲想作嘔，口又乾唔俾飲水，

到我暈到咁上下痛，又要姑娘黎睇下開到幾度

開到６度，７度，８度我越來越痛但又好開心，

我心諗我就黎到終點喇！痛住期待９度既來臨～

大約８：４５ＰＭ我終於等到入產房

雖然好痛，但我知我打完大佬就唔痛架喇～

我已經合埋眼忍痛後被推出侯產室，當時我聽到屋企人既聲音叫我加油

但我都無望佢地，因為我要忍痛～哈哈

到入左產房，姑娘就話已經到左９度喇～過多陣就生得，

就幫我較好個床位，叫老公入黎陪我，教我一陣用力，唔好大叫，

好似急大便就要用力，

當醫生同兒科醫生都到左，雖然自己好痛，但睇到佢地笑笑口好輕鬆咁，

個人自然無咁緊張，我天真到覺得有醫生係度我一陣生仔唔會有咩難度啦！

到最後我發現用力用到想斷氣，

浣腸、剪會陰、插尿喉我全部都做齊，不過呢Ｄ都係小事，

仔都生得出，其他一切變得好小事！

到真係痛喇～就要用力，兩位姑娘不停推我個肚出，

我自己不停用力，

你會見到大家都好努力為你去做生仔呢件事，

我就唔可以放棄！

我老公一直係身邊抬住我個頭叫我用力，ＢＢ就出黎架喇！用力用力～

經過幾番既用力用力，醫生話見到頭髮但我又無氣繼續，

到最後回一回氣再用力推哂所有力落下面，

我以為要繼續，點知我已經生左，個頭仔一出，

我再大叫痛左下，我見住ＢＢ出世個下，醫生整開條臍帶，

出左黎我成個人同個肚輕鬆哂～好爽！

ＢＢ已經哇哇聲喊～呢個時候姑娘立即抱佢黎放係我心口，

雖然ＢＢ好醜，但我好開心，又未有話感動到喊既，

係好開心，但又好陌生，呢個就係我個仔。

當個人清醒返，開始同醫生姑娘傾計，

麻煩哂同辛苦哂佢地咁幫忙，好感激大家，

ＢＢ係我心口一陣，姑娘仲將佢錫左我一啖，辛苦哂媽咪～

個下好SWEET，之後就交到旁邊兒科醫生手中檢查，

兒科醫生檢查完過黎講ＢＢ健康，重２。６３ＫＧ

之後姑娘又抱返俾我地，幫我地影相，

生完仔無理由會靚住咁影，所以人生樣衰但好值得紀念！

影完又放係床仔俾我老公影佢，我仲叫佢拍片（只係影住ＢＢ），

俾我地影下相都係為左分下我心，

因為呢個時候醫生幫我聯緊傷口，雖然我都感覺到支針吉落黎再穿線個下，

但又唔係真係好痛，下面仲邊有感覺丫

望多兩眼個仔開心下好過～哈哈

生完我就好輕鬆喇～好似無事發生過一樣～

哈哈～完成哂之後BB就安排放到育嬰室

媽媽我就可以休息喇～我個人比較放得開，唔會因為掛住ＢＢ而緊張

我只知道我要休息！太攰喇～

被推到房後大家都仲未走黎睇下我～實在太窩心～

因為我入住雙人房，幸好旁邊的太太好好人，之後開始有姑娘不停入黎量血壓心跳，因為我生完跳一直都跳得好快，再夜Ｄ發現原來有發燒，吳醫生開藥同吊生理鹽水，一晚過後第二朝１０點我先落得床，已經再無發燒喇～

小溫子多謝你走進爸爸媽媽的生命裡，有你我更覺生命的圓滿幸福

頭先大家係產房門口都好緊張，但仲好開心咁自拍，哈哈～佢地係產房門口不過行來行去，連姑娘都忍唔住幫佢地睇下我生左未～哈哈哈！

生ｂｂ前一晚影既，好懷念大肚既感覺，好幸福！

生完水腫久久不退，仁安有安排親子時間，我同老公第一次入去抱ｂｂ，真係好感動！

紅卜卜既小寶寶就係我個仔喇！好開心可以做你媽媽～