[二十週五天] 第九次產檢 • 私家 • 林勇行醫生 • 照結構

[二十週五天] 第九次產檢 • 私家 • 林勇行醫生 • 照結構

| 30 NOV 2015 | 20WEEK 5DAY | 林勇行醫生

| 15 DEC 2015 | 22WEEK 6DAY | 林勇行醫生 (補影3D相)

終於等到今日可以見BB喇 ! 好期待呀 ! 不過又好緊張, 做媽媽既係緊張D, 事關照結構呢一PART都係大事, 事前又聽過D唔太好既消息, 令到我好擔憂, 前一晚真係訓得唔好, 心掛掛好擔心BB, 好擔心BB個心臟、腦、D骨、手指腳指、兔唇, 搞到訓得好差, 訓到都發夢。訓之前同老公傾計佢叫我放鬆D, 唔好自己嚇自己 , 萬一有咩事我真係好驚, 所以我係好驚咁過左一晚。

當日早上安排10:15am做檢查, 不過塞一塞車10:45am先到 (打左電話通知), 點知一等等到12:30pm先到我照, 已經開始餓, 坐對面既內地婦人仲係度食杯麵, 頂！咁唔健康但又好香囉～林醫生診所仲有另一位醫生, 我見好多內地婦人睇佢。

仲有林勇行醫生診所位置係匯豐總行後面街, 我仲走左去舊時文華酒店附近, 一入去個鬼佬即刻話我知, No doctors here ! 我先知自己去錯, 事關我之前就咁上網睇地址, 問都無問, 幸好老公熟佬, 好快去到衡怡大廈。大家記得唔好去錯 (應該只有我先咁豬去錯!)

林勇行醫生DR. LAM YUNG HANG

地址：中環皇后大道中5號衡怡大廈3102室電話：2877 3280

胎兒結構超聲波既檢查項目包括以下咁多, 每次照大約30分鍾左右, 仲要睇BB合唔合作, 好似我BB就唔合作, 我前前後後入左去照三次, 第一次成功照左九成, 第二次成功照埋個一成, 第三次再照想影3D相, 不過我個B餓到反轉爬係度, 好似擺明唔俾你照佢咁, 好搞笑 ! 可能真係太餓, 我1:30pm先照完, 我都好攰。最後張3D相要兩星期後返黎免費補影, 可以見多次林醫生而且唔收錢, 對我黎講抵左 ! 哈哈