[四週四天] 終於美夢成真 ♥ 小溫太升級做媽媽

[四週四天] 終於美夢成真 ♥ 小溫太升級做媽媽 

| 9 AUG 2015 | 4WEEK 4DAY |

當知道個一刻我真係覺得好神奇好神奇 ! 因為我已經將懷孕處於放棄狀態, 前前後後努力左兩年, 豪無聲氣, 由醫病到養身子, 中醫睇過好多, 朋友介紹話好, 我就去, 當然好睇緣份, 當然中醫都幫我唔到 ! 最後試埋人工IUI, 都係失敗 (我係仁安做, 遲下再講)  對於生BB呢回事, 我真係無哂辦法, 當然大家都講你仲好後生, 事關我之前有甲抗問題, 困擾我多年, 醫好就肥, 肥到有埋卵巢多囊症, 呢D問題我一直唔敢係卜講, 我已經決定寫一大篇講下經歷 !

話說我整個七月都唔係香港, 去左澳洲玩, 我出發前真係有好多朋友同我講, 好好去享受啦, 去到個邊可能做人成功, 真係前前後後五位朋友以上咁同我講, 哈哈哈 ! 我都係本住順其自然啦~ 去澳洲當然勁食生蠔, 反正乜都食, 唔理得咁多~ 哈哈 ! 咁返到香港係月尾應該差不多經期到, 我係經期唔準既, 但奇怪在自從五月做IUI失敗後, 我竟然經期準左兩個月, 三十八日黎一轉啦~ 咁我計好日子應該係返到香港個日就到~ 點知無黎~ 都唔理咁多~ 返黎用綠D驗驗先~ 點知都係無 ! 已經預左無~ 唔會失望, 仲咁岩有兩位朋友介紹我睇中醫, 我仲走去通經~ 中藥前後飲左一個星期多D~  仲有就係決定去日本玩返轉先 ! 生極都生唔出呀~ 我同老公想去日本好耐, 覺得無理由無了期咁等~~ 所以我地仲快手訂哂機票酒店去大阪浸溫泉 , 差在未租車, 滿心期待1/9出發~ 

返到香港到發現有左, 前後唔夠兩星期, 就係8月9號一早十點幾訓醒, 突然心血來潮不如拎支綠D驗下先啦 ! 就係咁好快, 條淺紅線, 係我期待以久既紅線, 好快咁出現左, 真係O左嘴~ 好冷靜咁拎多兩支驗 ! 同樣都係出現兩條紅線~ 個下有D驚, 又有D開心, 唔識點形容 ! 好似有D傻咁~ 哈哈 ! 好冷靜咁走入房同老公講, 我可能有左 ! 我老公都係同我一樣咁: [下] 左一聲~ 我明白, 因為突然左D~ 哈哈哈 ! 當然再講就好開心啦~ 哈哈哈~ 不過都係唔好咁開心住, 我地話去左食個LUNCH先, 之後再買支驗孕棒返黎再驗先 ! 當然.... 買定兩支, 真係有兩條線呀 ! 個下真係好開心~~ 我終於可以做媽媽喇 ! YEAH !

因為我係仁安睇開周敏姬醫生, 我第二朝就打電話去仁安同姑娘講我有左, 好快就安排我8月12號見醫生喇 ! 希望孕期一切順順利利 平安健康~ 

期待以久既紅線

買定兩支, 真係有兩條線