2014 Sabah 5D4N Schedule ● 沙巴自由行 DAY 1 《富源茶餐室、GAYA ISLAND RESORT、Fisherman's Cove 》

2014 Sabah 5D4N Schedule ● 沙巴自由行 DAY 1

《富源茶餐室、GAYA ISLAND RESORT、Fisherman's Cove 》

26 October,2014

2014 Sabah 5D4N Schedule ● 沙巴自由行《行程、電話上網卡、兌換、酒店、Local Tour》

去沙巴都係好突然話去, 去散下心, 放鬆一下~ 所以呢今次旅行主要都係酒店~ 所以我訂左間又靚又舒服又可以好嘆既resort~ 我自己睇返相都想再去玩呀 ! 哈哈~ 好貪心~ 好啦~ 今次係去5日4夜, 分別住左兩晚resort, 兩晚市中心酒店~ 同埋食左好好味既榴槤~ 真係好鍾意 ! 都唔知仲想講咩, 之前已經將最重要介紹部份係個行程度介紹哂喇~ 呢d卜主要係留俾我自己同我朋友同埋卜友們睇下既~ 哈哈哈 ! 好啦~ 去卜~

講真好耐無坐過AirAsia~ 原來唔俾帶野上機食, 因為有餐買既,我仲走去買杯咖啡 ! 上機前飲哂佢~ 邊飲得哂丫 ! 我會記住坐廉航唔好買咖啡! 哈哈~~

不過我地唔敢再坐AK~

小溫生溫太出發喇 ~~ Yeah !

天氣特別晴朗~ 世界真大~

安全到埗

機場唔算大~ 不過過關都算快~ 等行李比較混亂~

YEAH ! 時間岩岩好呀 ! 出到黎買埋電話卡就出發~

我地係T2出發, 機場坐的士出發一律 RM30(HK60) , 機場同市中心好近, 只有十五分鍾就出到市中心~ 哈哈~ 馬幣對港幣(1:2)

我地係要去Sutera Harbour Marina絲綢港碼頭登記, 登記前我地坐的士去左Asia city搵食, 真係咁岩見到人人都話必食既富源茶餐室~ 你眼見咁多人, 信心當然都好大啦 ! um.... 事實係有出名既/亦有難食既 ! 哈哈~~ 同埋唔好以為 asia city係大商場~ 佢係好70年代式商場~ 無野買~ 好舊~! 我揀黎呢度真係見地圖亂去, 因為佢比較近我要去既碼頭 !

富源 [必食]

牛油咖央白麵包 RM1.5 - 白麵包烘得香脆, 牛油咖央口感好香滑, 甜甜地我好鍾意

拉茶 - 好香好滑好好飲, 不過略甜

(我建議飲熱會香D, 不過天氣好熱, 飲唔飲到睇自己喇)

拉茶

牛油咖央白麵包 RM1.5

千萬唔好食呢道D飯同麵 ! 最好既米都出哂口~ 其他全部都好難食 !

全部都係炸炸炸~

好多飲品~

唔好意思, 第一餐就餓親老公~ 哈哈哈哈 !

拿~~ ASIS CITY商場~

咁搵見到有得換錢~~

行返出大街上的士, Sutera Harbour Marina , 留意呢個碼頭唔係平時買飛出島玩架 ! 呢個碼頭只係FOR去呢間酒店RESORT ! 要留意呀 !

入到去CHECK IN先~~ 呢個就係活動表喇~ 入左去唔出返黎架喇~ 因為每次入島都會計錢~RM140 (round trip)

welcome sorbet ~

青檸味好清新, 入黎坐低食返杯成個人都涼哂呀~

我地坐4:00pm既船, 早左少少到, 就四圍參觀下

碼頭泊滿遊艇

4點準時上船

好快就黎到RESORT~~ 一群人落船後分別被帶到LOBBY, 先安排welcome drink~ 唔記得咩味, 我記得都係好飲既~ 哈哈~ 反正飲完涼透心~ 之後會有工作人員介紹resort既一切~ 入住期間內有咩活動, 餐廳有邊幾間, 全部都會介紹得好清楚~ 服務非常好 ! 清楚哂就會帶我地入房~