再見 我最尊敬的王先生

再見 我最尊敬的王先生

係星期四中午25/9既時候, 突然接到媽媽電話, 話王生昏迷入院, 李小姐想我地去睇王生, 我個心一聽到呢個消息, 成個心實哂, 好想快D去見王生, 當日五點我地到達醫院指定病床, 眼見平時笑咪咪, 好精神好好中氣既王生, 紗布包住頭, 插住喉管, 然後好深既呼吸聲, 我眼淚都引唔住流出黎, 我個心實哂, 我唔敢相信眼前呢個係王生, 因家屬同醫生講緊野, 我同老公爸媽唔方便聽, 我地係門口等, 因探病既人太多, 只能兩個兩個入去, 我呆左地望住樓梯, 唔敢相信, 爸媽先入去探望王生, 等到爸媽出黎, 我眼見媽咪眼紅紅, 我立即入去, 眼見插住喉既王生係床上面訓著左, 李小姐見到我地, 就叫王生, 快D醒喇 ! 黃美詩同溫生黎探你喇, 你唔係想知佢有BB未既, 快D起身幫佢把胍啦~ 你話佢好福氣一定好快有BB架, 你話要收佢BB做契仔架, 你快D起身睇下黃美詩啦~ 我聽到咁樣我真係忍唔住眼淚兩行兩行咁流, 我真係呆左, 摸住王生隻手同佢講, 王生我黎左喇 ! 你快D起身啦~ 唔好再訓喇 ! 你訓左好耐喇 ! 要起身喇~ 溫生呢個時候搭住我一齊叫王生, 起身喇~ 唔好訓喇~ 眼見之前好精神既王生, 佢真係攰喇 ! 聽住李小姐同王生講, 叫佢起身, 我真係好心痛, 王生真係好記掛我, 成日都話想見我, 我幾日無去, 我真係呢個星期無去見佢, 我無去同佢放花, 李小姐仲同我講, 王生出事前一日仲記掛我, 問黃美詩今日有無約放花呀 ? 我真係後悔到頂點, 係我懶, 係我以為成日見, 見少個禮拜無所謂, 係我自己懶, 14號果晚係廣州既再見, 原來已經係以後既再見 ! 王生再無起身, 再無笑笑口同我講你好 ! 因為佢已經離開左我地~ 我到今日都無法相信呢個事實, 由知道後我除左喊, 就只有好掛住佢, 我好記得佢同我講過既說話, 教過我既事, 一切都變得令我珍惜, 一切都要我自己記得, 因為佢無辦法再親口提醒我 !

我與王生睇見黃昏日落前影既相. 係我地最後的合照 :(

我記得我係2014年1月23日遇到王生, 一切大家既命運好似整定咁, 好有緣, 王生係大家心目中都係一等一大好人, 完全只為別人, 忘記自己, 真係佛心~ 王生同李小姐對我特別上心, 我身體一有唔好, 王生立即為我開藥, 我既舊病老朋友都醫好埋, 我真係好感激王生, 我好相信佢, 佢真係好有醫德, 直到黃爸媽都有睇, 大家了解後做埋朋友, 好似緣份一切黎得好快, 大家都好交心, 真心做好朋友 ! 王生成日讚黃爸媽係一定一好人, 黃爸爸係超級好爸, 係我地收來既福有咁好既爸爸, 又讚黃媽媽教導有方, 教導我地四兄弟姐妹全部都咁乖, 咁聽話, 一家人咁開心, 係福氣 ! 之後我都有介紹朋友認識王生, 大家認識深左, 發現我好多朋友都有黎我屋企食飯, 相信我地一家人一定好開心, 就係咁細佬生日當晚我地就邀請王生李小姐到黎食飯, 大家當晚都非常開心, 有講有笑, 真係好開心 ! 王生知道我學緊車, 仲話到時拎到車牌, 借架車帶我去練車, 教我有咩要留意, 可惜仲未等到我拎車牌。

呢晚就係第一次上黎食飯一齊影相 , 

還記得王生第一次到我家吃晚飯後給我家人們的留言：

非常多謝你們一家人，帶給我一個喜出望外的晚上，豐富而美味的海鮮+和味的海南雞飯，更難得的是濃厚歡愉，親切的每一位，受到了你們的禮譽，真正是Warmest home style dinner. Very good feeling

人生有時真係好奇怪, 王生同我地既緣份越深, 我就無咁珍惜, 覺得一切理所當然, 可能我知佢地好鍚我, 越係咁錫我, 我呢加就越傷心, 一路希望我身體好返, 快D生BB, 更加幸福美滿 , 可惜一切都趕唔到, 不過我相信王生係天堂一定睇到, 我知道王生只係去左天堂享福。

由第一次見面起, 我記得王生教我, 要早訓最好10點前, 記得唔好飲凍野, 會凍親子宮, 記得訓教要著長褲, 唔好凍到膝頭哥,  之後王生仲教我要管理好自己既情緒, 教我點做一位好老婆, 佢仲話我第時既小朋友一定好孝順我, 只要我好好學習控制情緒, 晚年一定好好。我知道王生識睇相, 但佢從來無講佢識, 但我知道佢講左好多野我聽, 我都一一記得。佢仲話我生小朋友會幫我安胎, 教黃媽媽煲野我飲, 我前排懷疑有既時候, 佢同李小姐已經準備好D葉, 叫黃媽媽焗水我飲, 我真係唔敢相信我何得何能有一位咁好既人咁幫我, 黃媽媽常說王生係我貴人, 王生自己都常說同我地一家人緣份好深厚, 上次食飯才說, 數數手指其實我地只係認識數個月, 我計落到呢加起只有八個月的緣份, 呢八個月入面, 王生教識我如何做人, 如何做好老婆, 好女兒, 如何做好準備做媽媽, 有BB要保持開心, 任何事都要正面, 樣樣都係開心事, BB先會開心健康, 我仲記得14號當日我地係廣州, 王生揸車個陣突然講, 如果你懷孕期間覺得唔開心, 一定要講, 有咩唔開心一定要講出黎俾人知, 唔可以收埋係心入面, 如果唔係好易有病, 我同老公聽到大家立即對望一眼, 我仲笑笑口, 放心啦我有唔開心一定會話俾大家知既~ 估唔到已經成為最後既留言, 王生再無機會親口提醒我。

王生好捧我場, 只要我整既佢同李小姐都好欣賞我, 會鼓勵我, 我為左黃媽媽去學芋頭酥, 原來佢地都好喜歡食, 所以我最近每次整都有拎俾佢地食, 呢加我已經越整越好, 我相信王生一定知道的。

因為相聚有時真係好講緣份, 就係因為大家好真心真誠能成為朋友, 在最好時刻分離, 眼淚真係流過不停, 咁好既人我真係唔知有無緣份再遇上, 那份為病人出心出力, 不計較回報, 用真心去幫人, 真係令我非常欣賞這位良師前輩。

雖然王生既離去, 好突然, 大家都一時間未能接受, 但我相信亦教導大家要更加珍惜身邊既一切人和事, 幸福不是必然, 有人對你好, 你要萬分感激, 因為對你好, 不是必然, 老公知我好傷心, 其實我知佢都好難過, 每時每刻陪我, 屋企人一齊陪我, 大家一齊走過去, 懷念王生的好人好事, 我打呢篇卜係想俾自己記得呢一切, 王生時常記起我, 為我做的一切 ! 我除了心存感激、感欣、感謝 ! 

王生 我會永遠記得你 多謝你