馬蹄糕 Water Chestnut Pudding ( 附食譜 )

馬蹄糕 Water Chestnut Pudding ( 附食譜 )

農曆新年就快到喇 ! 小溫太都為左新年去辦年貨, 不外乎都係買下裝飾呀~ 買下利是封呀~ 入下利是呀~ 買下年花呀~ 買下禮盒呀~ 最重要又最忙既一件就係整下糕喇 ! 講真整糕我實在係好新手, 係上年又失敗過, 心情差爆~ 今年有好友幫手~ 決定再俾機會自己 ! 人有目標就一定會成功既~ 只要肯努力, 同埋有人幫忙 ! 好多謝我既老師Shadow子 哈哈哈~ (佢叫盡快出卜, 我答應你...我已經好快喇 ! 哈哈)

今年仲可以快手到一次過蒸四底糕呀 ! 我真係愛爆我個鑊同埋個蒸架~ 雖然一年威一次 ! 但都非常有用~~ 我仲要係事前唔知可以放咁多底糕~ 真係好有驚喜~ 好開心呀 ! 

呢底就係小溫太既馬蹄糕喇 ! 我呢款係無加椰汁既~ 又簡單又而整 ! 

**PS: 我以上係用左2份份量做四底既**

[ 材料 ] : around 兩底

6"透明膠模 ‧‧‧ 1-2盒

馬蹄粉 ‧‧‧ 250g

黃片糖 ‧‧‧ 300g 

清水 ‧‧‧ 1050ml 

馬蹄 ‧‧‧ 15粒 (用刀拍碎 / 切細細粒)

1) 先落650ml水於鍋中, 將黃片糖切細舊加入水中煮至溶化及滾起

2) 馬蹄去皮後洗淨放入水中浸住

(馬蹄可一早先去皮)

3) 將一粒馬蹄一分為四慢慢拍碎, 又或者切細細粒較有口感, 拍好/切好後備用

4) 馬蹄粉加400ml清水, 拌勻成馬蹄粉水備用

(我會先倒200ml 後慢慢加上去,因為一次過倒哂400ml水, 馬蹄粉有機會溶唔哂 )

5) 將1/3 份量既馬蹄粉水倒加糖水鍋中, 一邊倒入一邊攪拌成稀糊狀, 離火, 待涼5分鍾

6) 將沈澱左既馬蹄粉水再次搞攪勻, 然後慢慢倒入稀糊狀糖水中, 一邊慢慢攪拌至混合均勻

7) 加入馬蹄粒拌勻

8) 倒入蒸盆, 放進已燒滾水鑊內, 用中火蒸45分鍾至糕成透明狀

原來我隻鑊可以一次蒸三底糕~ 

45分鍾後... 糕成形喇~~

YEAH ! 一次過蒸好哂四底糕出爐 好靚呀 !

好靚呀 ! 有一底高身少少係SHADOW既~ 可以送俾媽咪試下咪喇 ! 好開心呀 !

雖然唔係好難整, 但成功做到一底糕既心情係非常之咁興奮既~ 已經食哂喇~ 我年三十再開工 !

老公大讚好好味~ 可以拎出賣錢~ 嘩 ! 聽到咁既讚賞~ 辛苦都值得啦 ! 凍食又得, 煎一煎香佢食又得~ 大家快d自己試下整啦 !